aprile-sagunto

Barangay Sagunto by Aprile Balangue

“BARANGAY SAGUNTO”

Nakaiyanakak ken dimmakelak a baryo
Addaan ti banbantay ken dua a sitio
Saan a perpekto ngem pakakitaan ti progreso
Pagnaedan dagiti BAG-O, baranggay Sagunto

Ipatpategmi a baryo ti Sagunto
Maibilangen a nanam-ay ken asensado
Ta uray daliasatem a bantay ket sementado
Tapno tricycle makasang-at idiay ngato

Naparato, naisem, narespeto a tattao
Ditoy baryomi, isuda’t masabatmo
Agkakalasbang ken agkakaguapo
Uray gurongmi kasla pangmalo

Kinapintas daytoy lugarmi
Daydayawen sabali nga ili
Uray pammatimi, agsusupadi
Saan a lapped panagkakalaysami

Kapilya, eskwelaan ken paglalangoyan
Ditoy baryomi, adda a masapulam
Gayyem, agpasyarka, ditoyta imatangam
Pusaksak ti baryomi nga inda ap-apalan

Ipasindayawko man daytoy a lugarmi
Urnos ken kapia, nagtalinaed kadakami
Papagayam, umaykayo ditoy ayanmi
Ta pasangbayendakayo, nabara a kablaawmi.

 

Aprile Rae Ann Balangue
June 23,2014
Amman, Jordan

Leave a Reply